बुधवार-शनिवारी सकाळपासून संध्याकाळपर्यंत गाडीची प्रतीक्षा; नागरिकांचा संताप — “होम डिलिव्हरी नेमकी कुठे गायब झाली?”
मेकिंग महाराष्ट्र – चेतन शिंदे
बारामती : तांदुळवाडी परिसरातील भारत गॅस ग्राहकांना सिलिंडर मिळवण्यासाठी चक्क दिवसभर रस्त्यावर थांबावे लागत असल्याची तक्रार समोर आली आहे. दर बुधवारी आणि शनिवारी गॅसची गाडी परिसरात येते; मात्र घरपोच सिलिंडर मिळण्याऐवजी ग्राहकांनाच गाडीची वाट पाहत रस्त्यावर उभे राहावे लागत असल्याचा आरोप नागरिकांनी केला आहे. त्यामुळे “ग्राहकांकडून पैसे घेऊनही होम डिलिव्हरी कुठे गेली?” असा संतप्त सवाल आता उपस्थित होत आहे.
नागरिकांच्या म्हणण्यानुसार, गॅसची गाडी सकाळी साडेदहा वाजण्याच्या सुमारास परिसरात येते. मात्र सिलिंडर मिळण्यासाठी नागरिकांना दुपारनंतरही गाडीभोवती थांबावे लागते आणि काही वेळा संध्याकाळी पाच-सहा वाजेपर्यंत प्रतीक्षा करावी लागते. त्यामुळे एका सिलिंडरसाठी नागरिकांचा संपूर्ण दिवस अक्षरशः वाया जात असल्याची भावना व्यक्त होत आहे.
नोकरी, व्यवसाय, शेती सोडून गॅसच्या गाडीची प्रतीक्षा!
तांदुळवाडी परिसरातील अनेक नागरिक नोकरी, व्यवसाय आणि शेतीच्या कामावर अवलंबून आहेत. गॅसची गाडी बुधवारी किंवा शनिवारी येणार असल्याने घरातील एका व्यक्तीला गॅस घेण्यासाठी दिवसभर उपलब्ध राहावे लागत असल्याचे नागरिक सांगतात.
“गॅससाठी सकाळपासून संध्याकाळपर्यंत रस्त्यावर थांबायचे, मग सिलिंडर घ्यायचा. यामुळे कामावर जाता येत नाही, शेतीचे काम थांबते आणि संपूर्ण दिवस वाया जातो,” अशी नाराजी नागरिकांनी व्यक्त केली.
“होम डिलिव्हरी का देत नाही?”; उत्तर मिळते—‘ऑफिसशी संपर्क साधा’
गॅसच्या गाडीवरील कर्मचाऱ्यांकडे नागरिकांनी घरपोच सिलिंडर का दिला जात नाही, अशी विचारणा केली असता “ऑफिसशी संपर्क साधा” असे सांगितले जात असल्याचा आरोप आहे.
त्यामुळे आता ग्राहकांचा थेट सवाल आहे की, गॅस बुकिंग केल्यानंतर ग्राहकांना घरपोच सेवा मिळणे अपेक्षित असताना त्यांना रस्त्यावर तासन्तास का थांबावे लागते?
महिला-ज्येष्ठ नागरिकांचे हाल; उन्हात रस्त्यावर थांबण्याची वेळ
गॅस सिलिंडर ही प्रत्येक घराची अत्यावश्यक गरज आहे. त्यामुळे त्यासाठी ग्राहकांना सकाळपासून संध्याकाळपर्यंत रस्त्यावर थांबावे लागणे ही वितरण व्यवस्थेतील गंभीर बाब असल्याचे नागरिकांचे म्हणणे आहे. महिला, ज्येष्ठ नागरिक आणि कामानिमित्त बाहेर पडणाऱ्या ग्राहकांना या पद्धतीचा मोठा त्रास सहन करावा लागत असल्याची तक्रार आहे.
गॅस एजन्सीने स्पष्ट करावे; प्रशासनाने लक्ष घालण्याची मागणी
तांदुळवाडी परिसरात भारत गॅसची अधिकृत होम डिलिव्हरी व्यवस्था नेमकी काय आहे? ग्राहकांना घरपोच सिलिंडर का मिळत नाही? गाडी एका ठिकाणी किती वेळ उभी राहते? आणि ग्राहकांना दिवसभर प्रतीक्षा का करावी लागते? या प्रश्नांची उत्तरे संबंधित गॅस वितरकाने द्यावीत, अशी मागणी नागरिकांनी केली आहे.
ग्राहकांचा वेळ, पैसा आणि श्रम यांचा विचार करून तांदुळवाडी परिसरात नियमित आणि सुरळीत घरपोच गॅस वितरण व्यवस्था सुरू करावी, तसेच ग्राहकांना सिलिंडरसाठी रस्त्यावर तासन्तास थांबण्याची वेळ येणार नाही यासाठी संबंधित विभागाने तातडीने लक्ष घालावे, अशी मागणी जोर धरत आहे.
“गॅस सिलिंडरसाठी संपूर्ण दिवस वाया घालवण्याची वेळ ग्राहकांवर येत असेल, तर ही कसली होम डिलिव्हरी?” असा संतप्त सवाल तांदुळवाडीतील नागरिकांकडून उपस्थित केला जात आहे.