मेकिंग महाराष्ट्र (प्रतिनिधी) दि 17 – पुणे विभागातील पुणे, सातारा, सांगली, सोलापूर व कोल्हापूर अशा पाच जिल्ह्यातील अ व ब वर्ग नगरपालिकांमधून बारामती नगरपालिकेने प्रथम क्रमांक पटकाविला आहे. बुधवारी म्हणजेच आज मुंबईमध्ये राज्याच्या कोकण, पुणे,नाशिक, छत्रपती संभाजीनगर, अमरावती व नागपूर या सहा महसूल विभागातील सहा प्रथम क्रमांकप्राप्त नगरपालिकांचे सादरीकरण केले जाणार आहे. बारामतीचे मुख्याधिकारी महेश रोकडे हे सादरीकरण करण्यासाठी मुंबईला रवाना झाले आहेत.गेल्या काही वर्षात बारामती नगरपालिकेचा आरोग्य विभाग व अधिकारी आणि कर्मचारी यांनी अथक परिश्रम घेऊन शहर स्वच्छता व सुशोभिकरणाकडे जाणीवपूर्वक लक्ष देऊन कार्य केले, त्या मुळे बारामतीला पुणे विभागात प्रथम क्रमांक तर देशात अठरावा क्रमांक मिळाला आहे.काही दिवसांपूर्वीच देशातील पहिल्या वीस स्वच्छ शहरांमध्ये बारामतीचा क्रमांक अठरावा आला होता. लोकसंख्येनिहाय विचार करता बारामती देशात प्रथम क्रमांकावरचे शहर होते. बारामतीपेक्षा वरच्या क्रमांकावर असलेल्या सर्वच सतरा शहरांची लोकसंख्या बारामतीहून अधिकची होती.उपमुख्यमंत्री अजित पवार यांनी विशेष अभिनंदनचे पत्र पाठवून मुख्याधिकारी यांचे अभिनंदन केले.
अभिनंदनचे पत्रात काय म्हणाले अजित पवार…
‘मुख्यमंत्री सक्षम शहर स्पर्धा २०२३’ मध्ये पुणे विभागातील अ, ब, क वर्ग नगरपरिषदांमध्ये बारामती नगरपरिषदेनं सर्वोत्कृष्ट कामगिरी बजावत, पुणे विभागात प्रथम क्रमांक मिळविल्याबद्दल बारामती नगरपरिषदेचे मुख्याधिकारी
श्री. महेश रोकडे,
नगपरिषदेचे सर्व अधिकारी, कर्मचारी यांचे सर्वप्रथम मनःपूर्वक अभिनंदन करतो.
——————————
बारामती नगरपरिषदेने नगरविकासाच्या क्षेत्रात सातत्यपूर्ण उत्कृष्ट कामगिरी बजावली आहे. राज्यातील, देशातील प्रगत, उपक्रमशील नगरपरिषदांमध्ये बारामती
नगरपरिषदेचा समावेश होतो.बारामती नगरपरिषदेत वेळोवेळी प्रतिनिधित्वं करणाऱ्या स्थानिक नेतृत्वाची दूरदृष्टी, विकासाप्रती बांधिलकी तसेच नागरिकांच्या एकजुटीच्या सहकार्यामुळेच बारामती नगरपरिषदेला सर्व क्षेत्रात सातत्यपूर्ण प्रगती करणे, यश मिळवणं शक्य झालं आहे. मुख्यमंत्री सक्षम शहर स्पर्धा २०२३ मधील यश हे सुद्धा सातत्यपूर्ण यशस्वी कामगिरीतील महत्वाचा टप्पा आहे. या यशाबद्दल मी पुन्हा एकदा शहरातील स्थानिक नेतृत्वाचं, बारामती शहरवासियांचं अभिनंदन करतो. देशात ‘विकासाचे मॉडेल’ अशी बारामतीची ओळख आहे. ही ओळख अधिक ठळक होण्यामागे बारामतीकरांमध्ये असलेला विकासाचा ध्यास, त्यासाठी एकजूट होऊन कष्ट करण्याची भावना प्रमुख आहे. विकासाच्या प्रत्येक कार्याला शहरवासियांकडून मिळणारं सहकार्य, स्थानिक नेतृत्वाकडून विकासाबद्दल दाखविली जाणारी बांधिलकी,
शहर प्रशासनातील अधिकारी, कर्मचारी यांचे परिश्रम, याच्या एकत्र परिणामस्वरुप बारामती शहराचा विकास वेगाने होतो आहे. विकासाचा हा वेग कायम ठेवण्यासाठी, ‘विकासाचे मॉडेल’ ही बारामतीची ओळख सातासमुद्रापार, जगभर पोहचवण्यासाठी यापुढच्या काळात आपण सर्वजण एकदिलानं, एकजुटीनं, सर्वशक्तिनिशी प्रयत्न करुया. बारामती शहराला अधिक स्वच्छ, अधिक सुंदर,अधिक सक्षम बनविण्यासाठी दृढसंकल्प करुया, असं आवाहन करतो. ‘मुख्यमंत्री सक्षम
शहर स्पर्धा – २०२३’ मध्ये मिळालेल्या यशाबद्दल सर्वांचे पुनःश्च अभिनंदन………
